Categoria: Citazioni

 

‘A   L I V E L L A

di  Totò   (Antonio De Curtis).

 

 

Ogn’anno, il due Novembre, c’è l’usanza
di andare, per i defunti, al cimitero.
Ognuno ll’ha dda fa’ chista crianza,
ognuno ha dda tené chistu penziero.

Ogn’anno, puntualmente, nel giorno
di chista triste e mesta ricorrenza,
pur’io ci vado e, con i fiori, adorno
il loculo marmoreo ‘e zi’  Vicenza.

‘St’anno m’è capitata ‘n’avventura.
Dopo di aver compiuto il triste omaggio,
Madonna, si ce pienzo, che paura!
Ma po’ facette un’anema ‘e curaggio.

‘O fatto è chisto, statemi a sentire.
S’avvicinava ll’ora d’ ‘a chiusura
e io, tomo tomo, stavo per uscire,
buttando l’occhio su qualche sepoltura.

QUI DORME IN PACE IL NOBILE MARCHESE
SIGNORE DI TREVISO E DI BELLUNO
ARDIMENTOSO EROE DI MILLE IMPRESE
MORTO L’ 11 MAGGIO DEL 31.

‘O stemma cu ‘a curona ‘ncoppa a tutto…
…sotto,’na croce fatta ‘e lampadine,
tre mazze ‘e rose cu ‘na lista ‘e lutto,
cannele, cannelotte e sei lumine.

Proprio azzeccata ‘a tomba ‘e ‘stu signore
ce steva n’ata tomba piccerella,
abbandunata, senza manco un fiore,
pe’ segno, sulamente ‘na crucella.

E ‘ncoppa ‘a croce, a stento si liggeva:
ESPOSITO GENNARO NETTURBINO.
Guardannola, che ppena me faceva
‘stu muorto, senza manco nu lumino!

Chista è ‘a vita, – ‘ncapo a me penzavo-
chi ha avuto tanto e chi nun ave niente!
‘Stu povero maronna s’aspettava
ca pure all’atu munno era pezzente?

Mentre fantasticavo ‘stu penziero,
s’era gia fatta sera e quase notte,
e i’ rummanette chiuso priggiuniero,
muorto ‘e paura…’nnanze ‘e cannelotte.

Tutto a ‘nu tratto, che veco ‘a luntano?
Doje ombre avvicenarse ‘a parte mia…
Penzaje: ‘stu fatto a me mme pare strano…
Songo scetato, …duormo, o è fantasia?

Ate che fantasia: era ‘o Marchese,
c’ ‘o tubbo, ‘a caramella e c’ ‘o pastrano;
chill’ato, appriesso ‘a isso, male in arnese,
tutto fetente e cu ‘na scopa ‘n ‘mmano,

e chillo, certamente è don Gennaro,
‘o muorto puveriello… ‘o scupatore.
‘Int’a ‘stu fatto i’ nun ce veco chiaro:
so’ muorte e se retireno a chist’ora?

Putevano stà ‘a me quase ‘nu palmo,
quando ‘o Marchese se fermaje ‘e botto,
s’avota e, tomo tomo, …calmo calmo,
dicette a don Gennaro: “Giovanotto!

Da voi vorrei saper, vile carogna,
con quale ardire e come avete osato
di farvi seppellir, per mia vergogna,
accanto a me, che sono un blasonato?!

La casta è casta e va, sì, rispettata,
ma voi perdeste il senso e la misura:
la vostra salma andava, sì, inumata,
ma seppellita nella spazzatura!

Ancora oltre sopportar non posso
la vostra vicinanza puzzolente!
Fa d’uopo, quindi, che cerchiate un fosso
tra i pari vostri, tra la vostra gente”.

“Signor Marchese, nun è colpa mia.
i’ nun v’avesse fatto chistu tuorto;
mia moglie è stata a ffa’ ‘sta fessaria,
i’ che putevo fa’ si ero muorto?

Si fosse vivo ve farrie cuntento,
pigliasse ‘a casciulella cu ‘e qquatt’osse,
e, proprio mo, obbj …’nd’a ‘stu mumento,
mme ne trasesse dint’ a n’ata fossa”.

“E che cosa aspetti, oh turpe malcreato,
che l’ira mia raggiunga l’eccedenza?
Se io non fossi stato un titolato,
avrei già dato piglio alla violenza!”

“E famme vedé… e piglia ‘sta violenza!
‘A verità, Marché, mme so’ scucciato
‘e te sentì, e, se perdo ‘a pacienza,
mme scordo ca so’ muorto e so’ mazzate!

Ma chi te cride d’essere…nu ddio?
Ccà dinto, ‘o vvuò capì ca simmo eguale?
Muorto si’ tu e muorto so’ pur’io,
ognuno, comm’ a’ nato, è tale e qquale!”

“Lurido porco,!… Come ti permetti
paragonarti a me ch’ebbi natali
illustri, nobilissimi e perfetti,
da fare invidia a Principi Reali?”

“ma qua’  Natale …Pasca e Ppifania!!
T’ ‘o vvuò mettere ‘ncapo…’int’a cervella
che staje malato ancora ‘e fantasia?
‘A morte ‘o ssaje ched’è?…È ‘na livella.

‘Nu rre, ‘nu maggistrato, ‘nu grand’ommo,
trasenno ‘stu canciello ha fatto ‘o punto
c’ha perzo tutto, ‘a vita e ppure ‘o nomme,
e tu, nun t’è fatto ancora chisto cunto?

Perciò, stamme a ssentì…nun fa’ ‘o restivo,
suppuorteme vicino,… che te ‘mporta?
‘Sti pagliacciate ‘e ffanno sulo ‘e vive:
nuje simmo seri…appartenimmo ‘a morte!